Հին Կարբին կամ Արենի գյուղատեղին

Արենի (արիների, քաջերի բնակատեղի, նաև՝ Հին Կարբի) գյուղատեղին գտնվում է Կարբի գյուղից մոտ 2 կմ արևմուտք, փոքր բարձունքի վրա: Գյուղատեղին ամբողջությամբ պատած է բնակելի շինությունների ավերակներով, որտեղ նկատելի են նաև փողոցներն ու տնամերձ բակերը:
Արենին առաջին անգամ հիշատակվում է 774-775 թթ. Հայաստանում արաբական տիրապետության դեմ բռնկված ապստամբությամբ: Հետագայում գյուղը հիշատակվում է Հովհաննավանքի կաթողիկե եկեղեցու 13-րդ դարի և Ուշիի Սբ Սարգիս վանքի 1329 թ. արձանագրություններում:
Գյուղատեղի կենտրոնում գտնվում են 4-5-րդ դդ. կառուցված եռանավ բազիլիկ եկեղեցու ավերակները: Պահպանվել է պատերի բարձրությունը մինչև 3 մ:
Տարածքում կան 6-7-րդ դդ. քառակող կոթողներ, 13-14-րդ դդ.՝ քանդակազարդ խաչքարեր, տապանաքարեր և այլն:
Գյուղատեղին հայ բնակչությունից անշքացել ու լքվել է 16-րդ դարի վերջերին:
Արենին վնասվել է 1264 թ.՝ Ուշիի, 1679 թ.՝ Արարատյան, 1827 թ.՝ Ծաղկաձորի և 1840 թ.՝ Արարատի երկրաշարժերից:
Ներկայացնում է ՊԺԳՀ կենտրոնի գիտաշխատող Արմեն Ասատրյանը:
Առավել մանրամասն՝ https://youtu.be/K9COjBjHkGU