Փ. Բուզանդի 1/3, Երևան 0010, ՀՀ
Հարգելի´ գործընկերներ,
ՀՀ ԿԳՄՍ նախարարության «Պատմամշակութային ժառանգության գիտահետազոտական կենտրոն» ՊՈԱԿ-ը և Լոռի-Փամբակի երկրագիտական թանգարանը 2026 թ. հոկտեմբերի 23-ին կազմակերպում են «Լոռվա պատմահնագիտական ժառանգությունը» խորագրով հանրապետական գիտաժողով: Գիտաժողովը տեղի կունենա Լոռի-Փամբակի երկրագիտական թանգարանում՝ իր հարկի ներքո համախմբելով Լոռվա մշակութային ժառանգության ուսումնասիրության ու պահպանության տարբեր բնագավառներում մասնագիտացող հետազոտողներին (պատմաբաններ, մշակութաբաններ, արվեստաբաններ, հնագետներ, ազգագրագետներ, ճարտարապետներ, վերականգնող-կոնսերվատորներ, ֆոնդապահներ և այլք)՝ ներկայացնելու իրենց ընթացիկ կամ ավարտուն ուսումնասիրությունները:
Գիտաժողովը լայն հնարավորություն է ընձեռում մասնագետներին ծանոթանալու այս ուղղությամբ իրականացվող հետազոտական թեմաներին և համատեղ գիտական ծրագրերի մշակման հող նախապատրաստում։
Գիտաժողովի զեկուցումների թեմատիկ ուղղություններն են՝
- Պատմություն,
- Հնագիտություն,
- Ազգագրություն,
-Պատմամշակութային ժառանգություն (ճարտարապետություն, մշակույթ, արվեստ), - Գտածոների վերականգնման, ամրակայման և պահպանության ավանդույթներ և մեթոդներ, թանգարաններում պահվող հավաքածուների ներկայացում:
Գիտաժողովին մասնակցելու համար մինչև սույն թվականի սեպտեմբերի 18-ը անհրաժեշտ է գիտաժողովի կազմկոմիտեին [email protected] էլ. հասցեով ուղարկել զեկուցման հիմնադրույթները 350-400 բառի սահմաններում, ներառյալ՝ զեկուցման թեման, մասնակցի անունը և ազգանունը, հաստատությունը, որը ներկայացնում է, ինչպես նաև կոնտակտային տվյալներ (էլ. հասցե, հեռախոսահամար): Հիմնադրույթները պետք է արտացոլեն ներկայացվելիք զեկուցման հիմնական գաղափարը և ուսումնասիրության նպատակը:
Թեմատիկ զեկուցումների համար սահմանվում է 15 րոպե և ևս 5 րոպե՝ քննարկումների համար։
Դրական կարծիքներ ստացած հիմնադրույթների հեղինակների մասնակցության հաստատման վերջնաժամկետն է սեպտեմբերի 30-ը:
Ուշադրություն. Գիտաժողովի նյութերը տպագրվելու են «Հուշարձան» գիտական հանդեսի հերթական համարում:
Գիտաժողովն անցկացվում է Հայագիտական ուսումնասիրությունները ֆինանսավորող համահայկական հիմնադրամի դրամաշնորհով։
Հարգանքով՝
Գիտաժողովի կազմկոմիտե